Загадкі зімушкі-зімы
На гэтай нядзелі ў нашым класе прайшла выхаваўчая гадзіна у выглядзе займальнага гульнявога занятку “Лясныя загадкі зімушкі –зімы”. Дзеці вучыліся разпазнаваць сляды звяроў на снезе, пазнаёміліся з народнымі прыкметамі студзеня, з паходжаннем назвы месяца, азбукай народнай мудрасці; зрабілі замалёўкі зімовавга лесу.
Студзень – сярэдзіна зімы. Як і іншыя месяцы ён мае некалькі назваў: “ледень, січень, стужень”. Усе гэтыя назвы адлюстроўваюць яго няпросты характар: трашчаць моцныя маразы, скаваны ільдом азёры ды рэчкі, мятуць завеі і насыпана многа-многа снегу.
Але ў гэтым годзе першая палова студзеня была цёплаю і без снегу. На пачатку месяца ў лесе яшчэ нават можна было ўбачыць грыбы: апенькі, зялёнкі, падзялёнкі, а дзе-нідзе і лісічкі. Ад незвычайна цёплага надвор’я ў некаторых раслін набухлі пупышкі і, здавалася, што яны вось-вось раскрыюцца, зазелянеюць… Выпаў снег і ўсё адразу змянілася: нібы закалдаваныя стаяць дрэвы, а навокал усё ахутана белаю пярынаю.
